विद्यार्थ्यांसाठी शांत, सुरक्षित व प्रेरणादायी अभ्यास केंद्र उभारण्याचा ऐतिहासिक निर्णय.
चंद्रपूर शहरातील प्रभाग क्रमांक १ तुकुम अंतर्गत येणाऱ्या तुलसीनगर वार्डामध्ये सामाजिक आणि शैक्षणिक विकासाच्या दृष्टीने महत्त्वपूर्ण पाऊल उचलण्यात आले आहे. परिसरातील विद्यार्थ्यांना दर्जेदार व सकारात्मक अभ्यासाचे वातावरण उपलब्ध करून देण्यासाठी “डॉ. बाबासाहेब आंबेडकर सार्वजनिक अभ्यासिका” उभारण्याचा निर्णय घेण्यात आला असून, यासाठी दुबे, मुरकुटे व तेलहांडे यांच्या लेआउटमधील जागा अधिकृतरित्या आरक्षित करण्यात आली आहे.
या निर्णयामुळे परिसरातील विद्यार्थी, युवक तसेच नागरिकांमध्ये आनंदाचे वातावरण निर्माण झाले आहे. भारतरत्न डॉ. बाबासाहेब आंबेडकर यांनी शिक्षणाला समाज परिवर्तनाचे प्रभावी साधन मानले होते. त्याच विचारांना पुढे नेत विद्यार्थ्यांना अभ्यासासाठी मोफत, शांत आणि सुरक्षित सुविधा उपलब्ध व्हावी, या उद्देशाने हा उपक्रम हाती घेण्यात आला आहे.
प्रस्तावित अभ्यासिका ही केवळ वाचनालय न राहता सामाजिक जागृती, बौद्धिक विकास आणि नव्या पिढीला प्रेरणा देणारे केंद्र ठरणार आहे. स्पर्धा परीक्षांची तयारी करणारे विद्यार्थी, शालेय व महाविद्यालयीन युवक-युवती तसेच विविध क्षेत्रातील अभ्यासकांना याचा मोठा लाभ होणार आहे. भविष्यात येथे स्पर्धा परीक्षा मार्गदर्शन वर्ग, शैक्षणिक कार्यशाळा, वाचन उपक्रम, करिअर मार्गदर्शन शिबिरे आणि सामाजिक प्रबोधनाचे कार्यक्रम आयोजित करण्याचा मानस व्यक्त करण्यात आला.
यावेळी तुलसीनगर विकास समितीचे अध्यक्ष मा. कृष्णाजी देवताडू, गणेश महल्ले तसेच समितीचे इतर सदस्य उपस्थित होते. त्यांनी या निर्णयाचे स्वागत करत हा उपक्रम परिसराच्या शैक्षणिक प्रगतीसाठी अत्यंत महत्त्वपूर्ण ठरणार असल्याचे सांगितले. गरीब व गरजू विद्यार्थ्यांना चांगल्या वातावरणात मोफत अभ्यासाची सुविधा उपलब्ध होईल, असे मत त्यांनी व्यक्त केले.
कार्यक्रमाला विविध सामाजिक संस्थांचे सदस्य, पदाधिकारी, युवक, महिला, विद्यार्थी तसेच डॉ. बाबासाहेब आंबेडकर यांच्या विचारांवर श्रद्धा ठेवणारे नागरिक मोठ्या संख्येने उपस्थित होते. उपस्थित नागरिकांनी लवकरात लवकर अभ्यासिकेचे बांधकाम पूर्ण करून विद्यार्थ्यांसाठी सुरू करण्यात यावे, अशी अपेक्षा व्यक्त केली.
उपस्थित मान्यवरांनी आपल्या मनोगतात शिक्षण हे समाजाच्या प्रगतीचे प्रमुख साधन असल्याचे सांगत अशा सार्वजनिक अभ्यासिकांमुळे नव्या पिढीला सकारात्मक दिशा मिळेल, असे मत व्यक्त केले. समाजातील वंचित, गरीब आणि ग्रामीण भागातील विद्यार्थ्यांना शहरातील दर्जेदार सुविधा उपलब्ध करून देण्याचा हा प्रयत्न कौतुकास्पद असल्याचेही त्यांनी नमूद केले.
या ऐतिहासिक निर्णयामुळे तुलसीनगर वार्डाच्या शैक्षणिक, सामाजिक आणि बौद्धिक विकासाला नवी चालना मिळणार असून, भविष्यात हा परिसर विद्यार्थ्यांसाठी प्रेरणास्थान ठरेल, अशी भावना नागरिकांमध्ये व्यक्त होत आहे.
