अभिजित वंजारी यांच्या विजयासाठी काँग्रेस एकवटली!

आज नागपुरात कार्यकर्ता मेळावा.

प्रदेश प्रभारी सिरीवेल्ला प्रसाद, प्रदेशाध्यक्ष हर्षवर्धन सपकाळ यांची प्रमुख उपस्थिती.

नागपूर :नागपूर विभाग पदवीधर मतदारसंघाचे काँग्रेस, महाविकास आघाडीचे अधिकृत उमेदवार ॲड. अभिजित वंजारी यांच्या विजयासाठी काँग्रेसने पूर्व विदर्भात कंबर कसली आहे. नागपूर विभागातील पदवीधर मतदारसंघाच्या निवडणुकीच्या पार्श्वभूमीवर काँग्रेसने संघटनात्मक पातळीवर मोर्चेबांधणी सुरू केली असून, उद्या गुरुवार, १५ ऑक्टोबर रोजी नागपुरात आयोजित कार्यकर्ता मेळाव्याच्या निमित्ताने पक्षाची एकजूट आणि ताकद दाखविण्याची तयारी सुरू आहे. सकाळी ११ वाजता दत्तात्रयनगर येथील महाकाळकर सभागृहात हा मेळावा होणार आहे. काँग्रेसचे महाराष्ट्र प्रभारी सिरीवेल्ला प्रसाद आणि प्रदेशाध्यक्ष हर्षवर्धन सपकाळ हे स्वतः उपस्थित राहून कार्यकर्त्यांना मार्गदर्शन करणार असल्याने या मेळाव्याला विशेष महत्त्व प्राप्त झाले आहे.

नागपूरसह वर्धा, चंद्रपूर, गडचिरोली, भंडारा आणि गोंदिया या सहाही जिल्ह्यांतील काँग्रेसचे प्रमुख पदाधिकारी, लोकप्रतिनिधी, माजी लोकप्रतिनिधी, विविध आघाड्या व संघटनांचे पदाधिकारी या मेळाव्याच्या निमित्ताने एकाच मंचावर येणार आहेत. पदवीधर मतदारसंघातील निवडणुकीसाठी पक्षाची रणनीती, प्रचाराचे नियोजन आणि मतदारांपर्यंत पोहोचण्याच्या दृष्टीने या मेळाव्यातून कार्यकर्त्यांना दिशा दिली जाणार आहे. प्रदेशातील प्रमुख नेते स्वतः प्रचाराच्या मैदानात उतरत असल्याने कार्यकर्त्यांमध्येही उत्साहाचे वातावरण निर्माण झाले आहे.

विरोधकांच्या आरोपांना एकजुटीतून उत्तर?

काँग्रेसमध्ये एकजूट नसल्याचा आरोप विरोधकांकडून सातत्याने केला जात असला, तरी पदवीधर मतदारसंघाच्या निवडणुकीच्या निमित्ताने काँग्रेसने संघटनात्मक ताकद पणाला लावली आहे. सहाही जिल्ह्यांतील नेते, पदाधिकारी आणि कार्यकर्ते आपापल्या भागात स्वतंत्रपणे प्रचाराची धुरा सांभाळत आहेत. स्थानिक पातळीवर मतदारांशी संपर्क, बैठका, संघटनात्मक समन्वय आणि प्रचाराच्या माध्यमातून उमेदवाराच्या बाजूने वातावरणनिर्मिती करण्याचे प्रयत्न सुरू आहेत. त्यामुळे उद्याचा मेळावा हा केवळ कार्यकर्त्यांचा संवाद न राहता काँग्रेसच्या संघटनात्मक शक्तीचे प्रदर्शन ठरण्याची शक्यता आहे.

प्रदेश प्रभारी सिरीवेल्ला प्रसाद आणि प्रदेशाध्यक्ष हर्षवर्धन सपकाळ यांच्या उपस्थितीत होणाऱ्या या मेळाव्यातून पदवीधर मतदारसंघाच्या निवडणुकीसाठी पक्षाची भूमिका अधिक ठामपणे मांडली जाणार आहे. अभिजित वंजारी यांच्या प्रचाराला गती देणे, पदवीधर मतदारांपर्यंत पक्षाचा जाहीरनामा पोहोचविणे आणि सहाही जिल्ह्यांतील कार्यकर्त्यांमध्ये समन्वय वाढविणे, या दृष्टीने या मेळाव्याकडे पाहिले जात आहे.

सहाही जिल्ह्यांत नेत्यांकडून प्रचाराची धुरा

पूर्व विदर्भातील सहाही जिल्ह्यांत काँग्रेसच्या प्रमुख नेत्यांनी प्रचाराची जबाबदारी आपल्या खांद्यावर घेतली आहे. वर्धा जिल्ह्यात माजी मंत्री रणजित कांबळे, चंद्रपूर जिल्ह्यात खासदार प्रतिभाताई धानोरकर, विधानसभेतील काँग्रेसचे गटनेते तथा ब्रह्मपुरीचे आमदार विजय वडेट्टीवार आणि शिक्षक आमदार सुधाकर अडबाले प्रचारात सक्रिय आहेत. गडचिरोली-चिमूरचे खासदार डॉ. नामदेव किरसान हेही गडचिरोली जिल्ह्यात पक्षाच्या प्रचारासाठी प्रयत्नशील आहेत.

भंडारा आणि गोंदिया जिल्ह्यांत काँग्रेसचे माजी प्रदेशाध्यक्ष नाना पटोले, गोंदियाचे माजी आमदार गोपालदास अग्रवाल आणि दिलीप बन्सोड यांच्यासह स्थानिक पदाधिकारी प्रचाराची जबाबदारी सांभाळत आहेत. नागपूर जिल्ह्यात आमदार विकास ठाकरे, माजी मंत्री सुनील केदार, डॉ. नितीन राऊत, राजेंद्र मुळक, सतीश चतुर्वेदी, शहर काँग्रेस अध्यक्ष प्रफुल्ल गुडधे आणि जिल्हाध्यक्ष अश्विन बैस यांच्यासह पक्षाचे विविध पदाधिकारी कामाला लागले आहेत.

काँग्रेसशी संबंधित विविध संघटनांचे पदाधिकारी, युवक काँग्रेस, महिला काँग्रेस, एनएसयूआय तसेच शिक्षक आणि पदवीधर संघटनांच्या माध्यमातूनही संपर्क मोहीम राबविण्यात येत आहे. प्रत्येक जिल्ह्यातील स्थानिक नेतृत्वाने आपापल्या पातळीवर प्रचाराची आखणी केली असून, या प्रयत्नांना एकत्रित दिशा देण्याचे काम उद्याच्या मेळाव्यातून होण्याची अपेक्षा आहे.

पदवीधरांच्या प्रश्नांवर लक्ष केंद्रित

पदवीधर मतदारसंघाच्या निवडणुकीत रोजगार, शिक्षण, स्पर्धा परीक्षा, युवकांच्या संधी आणि शिक्षक-पदवीधरांच्या विविध प्रश्नांना महत्त्व असते. या मुद्द्यांवर पक्षाची भूमिका मतदारांपर्यंत पोहोचविण्यासाठी काँग्रेसकडून प्रयत्न केले जात आहेत. मागील सहा वर्षांत ॲड. अभिजित वंजारी यांनी केलेल्या कामांची माहिती देण्यासोबतच आगामी काळातील व्हिजन आणि मिशन मतदारांसमोर मांडण्यावर भर दिला जात आहे.

उद्याच्या मेळाव्यात प्रदेशातील प्रमुख नेत्यांकडून कार्यकर्त्यांना प्रचाराबाबत मार्गदर्शन केले जाणार असल्याने सहाही जिल्ह्यांतील कार्यकर्त्यांना नवी ऊर्जा मिळण्याची अपेक्षा व्यक्त होत आहे. काँग्रेसची संघटनात्मक ताकद, स्थानिक नेतृत्वाचा जनसंपर्क आणि पदवीधरांच्या प्रश्नांवर केंद्रित प्रचार या तीन बाबींच्या बळावर अभिजित वंजारी यांच्या विजयासाठी पक्षाने एकत्रित प्रयत्न सुरू केले आहेत.

संस्था, संघटना आणि पदवीधर मतदारांशी संपर्कावर भर

नागपूर विभाग पदवीधर मतदारसंघाचे उमेदवार ॲड. अभिजित वंजारी यांचा सहाही जिल्ह्यांत जनसंपर्क सुरू आहे. नागपुरात त्यांनी विविध संस्था आणि संघटनांच्या पदाधिकाऱ्यांसोबत बैठका घेऊन संवाद साधला. या भेटींमध्ये संस्थाचालकांनी त्यांना पाठिंबा देण्याची आणि मोठ्या संख्येने मते मिळवून देण्यासाठी प्रयत्न करण्याची ग्वाही दिल्याचे सांगण्यात आले.

नागपूरव्यतिरिक्त वर्धा, चंद्रपूर, गडचिरोली, भंडारा आणि गोंदिया या पाच जिल्ह्यांतही शिक्षक संघटना, पदवीधर संघटना आणि महिला संघटनांच्या माध्यमातून जनसंपर्क वाढविण्यावर भर दिला जात आहे. विविध संघटनांशी संवाद, स्थानिक प्रश्नांची जाण आणि मतदारांशी थेट संपर्क या बाबी अभिजित वंजारी यांच्या प्रचारासाठी महत्त्वाच्या ठरू शकतात. उद्याच्या कार्यकर्ता मेळाव्यातून या संपर्क मोहिमेला अधिक गती मिळण्याची अपेक्षा आहे.